”ग्रामीण सेवा शिविर रै सफलता री जुबानी“
शिविर ठिकाणो:- ग्राम पंचायत कितासर बिदावतान
तैसील:- श्रीडूंगरगढ़, जीलो:- बीकानेर
”सहमत सूं खाता बंटवारे रै मुजब आखै परवार री जिंदगाणी सहज“
अभयान:-‘ग्रामीण सेवा शिविर’
कामकाज सारूं: सैमत सूं खाता रो बंटवारो। तैसील श्रीडूंगरगढ़ रै गांव कितासर बिदावतान रा किरसाण श्री बद्रीराम पुत्र श्री कुम्भाराम जाति नाई आपरी उम्र रे पड़ाव साठ के सांकड़े पूगग्या। इंयारै परवार मांय बरसा सूं एक इज खातेदारी 4 भाइयां री भोम सागे ही। समै सारूं परवार रो घणो बधापो होयो, काश्त रा ढंग भी बदळता रिया, पण भौम रो दाखळो आज भी समूचे सागे हो, जिण सूं बियांने घणी सारी अड़चना सूं माथो लगाणो व्हेतो। जियां फसल बीमों, सरकारी सब्सिडी, कर्जो लेवणो, काळ सहायता आद।
हर बार तैसील जा र खाता फंटाणे री मांग रो विचार उपजे पण परवार री एकमत अर दफ्तरां री तरकीब र कारण अधखड़ काम व्हेतो।
पण अबार ”ग्रामीण सेवा शिविर“र तहत् जिण टैम राज रा आखा कामकाजी गांव आया जद इयां मानो टाडे में म्हारे भाग री कूंची खोल दी। उपखंड अधिकारी आदरजोग श्री शुभम शर्मा जी रै कैणे सूं राजस्व जत्थो अर सगळा दफ्तरां गांव आळा ने आपरी योजना सूं ओळखाण कराई अर खाता रो बंटवारों करणे री बिध सहज सारू सगळा री सहमति सूं बिना कीणी कोर्ट कचैड़ी र चक्कर ऊँ भी हुय सके आ बताई।
श्री बद्रीराम आप र भाई सैण बात करी अर सैंग जणा लिखियोड़ी सहमत सँूं मांग दाखिळ करवाई।
पटवारी जी जका वास्ते केबा है कै ऊपर करतार तो नीचे पटवार आप फुर्ती सूं मौका मायना कर काम सारू तरकीब सरू कर दीनी। गांव में सगळा भाइयां नै आप आप री खातेदारी भौम मिळगी।
नतीजो:-
1. सगळा भाई आप आपरी भोम पर न्यारा न्यारा लाभ लेवे ला।
2. खेती मांय कर्ज, सिंचाई रो लाभ, पीएम किसान निधि योजना रो लाभ।
3. परवार में प्रेम भाव। ओ सै सूं मोटो अर चोखो लाभ है सा।
श्री बद्रीराम कैवे क म्हारो जिवड़ो घणो हरखावे क पैला लागतोखाता बंटवाणो मतळब झगड़ो अर राड़ ही हुवे। पण अब ओ समझ आयो क सैमत हो र भी ओ काम घणो राजी-रळा भी सोरो हुवे।
विभाग आळा कामकाजी जितरो ईमानदारी अर नेकी सूं काम करियो है उणरे इण उल्लेखजोग काम सारू आभार जतावां अर धनवाद भी करा।
निचोड़:-
खाता फंटाणे री सहमत मांग सूं आज साबित हुयो है क जाणकारी अर नीत फुटरी हुवे तो कोई भी काम चाये बो सरकारी हुवे या सामाजिक, घणो ही सहज निपटान हुवेलो।
आखरी कहणो ओ हीज है सा क सरकार रौग्रामीण सेवा शिविर कोरो एक अभियान ही कोनी, आ एक इसी महताऊ योजना भी है जिण सूं जमीनी स्तर पर ठेठ आंतरे बैठया आमजण न आपरा काम सारू सबळो बणाणो है। राजस्थान सरकार रो इण महताऊ कारज सारू घणो घणो धनवाद अर आभार।
बद्रीराम जी फैरूं बोल्या ”आज जी सोरो होयग्यो, सरकार री घणी मैरबानी रैयी है, आज म्हारी मनचींती हुयग्यी।”
